ცოლიკოური

ცოლიკოური დასავლეთ საქართველოს მთავარი თეთრყურძნიანი ჯიშია და იმერეთის ვაზის ჯიშთა ჯგუფს მიეკუთვნება; გავრცელებულია აგრეთვე რაჭა-ლეჩხუმში, გურიაში, სამეგრელოში, აჭარასა და აფხაზეთში, ფართობით კი ქვეყანაში რქაწითელის შემდეგ მეორეა. სქელკანიანი და საგვიანო სიმწიფის ჯიშია, რაც დასავლეთის ნოტიო ჰავაში მის უპირატესობად იქცევა. მისგან აყენებენ მშრალ ღვინოს — ევროპული ან იმერული წესით, ანუ ქვევრში, ჭაჭის ნაწილთან ერთად — და ბუნებრივად ნახევრად ტკბილ ღვინოს: ცოლიკოური ლეჩხუმური „ტვიშის“ ერთადერთი ჯიშია, „სვირში“ კი ციცქასთან ერთად შედის.